Magoya bayan Buhari sun yi zanga-zangar goyon bayansa a birnin London

Daruruwan magoya bayan shugaban kasa Muhammadu Buhari sun yi dafifi a ofishin diflomasiyar Najeriya da ke birnin London da akewa lakabi da Abuja House, don nuna goyon bayansu ga shugaban kasar da yaje birnin na London don ganin likita.

Rahotanni sun ce ‘yan Najeriyar mazauna London sun fito sun yi zanga-zangar ce don nuna goyon baya ga shugaban kasar tare da kalubalantar wasu ‘yan Najeriya da suka gudanar da zanga-zangar adawa da shugaban kasar a baya-bayan nan.

Bayanai sun ce, magoya bayan shugaban kasar sun yi ta daga kwalaye mai nuna alhini tare da addu’ar Alla.. ya bai wa shugaban kasar lafiya tare da yi masa addu’a na musamman don neman ubangiji ya bashi cikakken lafiya.

Wannan na zuwa ne kwanaki kadan biyo bayan zanga-zangar da Reno Omokri daya daga cikin masu taimakawa tsohon shugaban kasa Good luck Jonathan ya shirya wanda ke adawa da ziyarar London shugaba Buhari ke yi.