Majalisar dokokin Kano ta dakatar da Khalid Ishaq Diso na watanni 3

Majalisar dokokin jihar Kano, ta dakatar da shugaban ƙaramar hukumar Gwale Khalid Ishaq Diso na tsawon watanni uku.

Majalisar ta ɗauki matakin ne a zamanta na yau Talata bayan samunsa da laifin sayar da wuraren gwamnati ba bisa ƙa’ida ba.

Majalisar ta kuma ce ta same shi da laifin rashin gudanar da aiki da majalisar kansilolin karamar hukumar da sauran wasu laifukan.

Hakan ya biyo bayan rahoton bincike kan ƙofin da aka gabatar wa majalisar a kansa.

Majalisar ta kuma sanar da maye gurbin Khalid Ishaq Diso da mataimakinsa tsahon watanni uku har sai an kammala bincike.