Majalisar Kansiloli: Ta dakatar da shugaban karamar hukumar Kumbotso

Majalisar kansiloli ta karamar hukumar Kumbotso da ke nan Kano, ta dakatar da shugaban karamar hukumar Alhaji Kabiru Ado Panshekara bisa zarginsa da karkatar da wasu kudade.

A baya-bayan nan ne dai hukumar yaki da cin hanci da rashawa ta jihar Kano, ta tsare shugaban karamar hukumar ta Kumbotson, bisa tuhumar sa da amfani da karfin kujerarsa wajen karkatar da tallafin kayan masarufin gwamnati na ragewa jama’a radadin dokar hana su fita saboda annobar coronavirus.

Yanzu haka dai bayan dakatar da Alhaji Kabirun da majalisar Kansilolin ta yi, haka zalika ta kuma bukaci majalisar dokokin jihar Kano da ta yi bincike kan dakataccen shugaban karamar Hukumar da take zargin ya yi babakere kan kudaden.