Mambobi 70 na ACF sun bayyana goyon bayansu ga Bashir Dalhatu

Fiye da mambobi 70 na Kwamitin Amintattu na kungiyar tuntuba ta Arewa wato ACF sun bayyana cikakken goyon bayansu gashugaban kwamitin, Bashir Dalhatu, tare da cewa babu wanda ya dakatar da shi daga shugabancin ƙungiyar.

Cikin wata sanarwa da wasu manyan jiga-jigan kungiyar suka sanya wa hannu, sun ce matakin da wasu tsirarun mambobi suka ɗauka na neman tsige Bashir Dalhatu ya saɓa wa kundin tsarin mulki da ƙa’idojin ƙungiyar.

Sanarwar ta kuma ce taron da aka gudanar a ranar 6 ga watan Mayu ba halastacce ba ne, tare da zargin cewa an yi amfani da shi wajen yaɗa zarge-zarge marasa tushe kan shugaban kwamitin.

Daga cikin waɗanda suka sanya hannu a sanarwar akwai tsohon Sakataren Gwamnatin Tarayya, Yayale Ahmed, da tsohon gwamnan Kano, Ibrahim Shekarau, da kuma tsohon gwamnan Jigawa, Sule Lamido.