Masarautar Gaya ta hana Hakimai zaman Karaga a fadojinsu

Masarautar Gaya ta hana hakimai zaman karaga a fadojin su tare da umartar waɗanda suke amfani da ita su gaggauta dena nan take.

Hakan na cikin sanarwar umarnin da Wamban Gaya kuma Babban Dan Majalisar Sarki, Dr. Mansur Ibrahim Gaya, ya fitar.

Sanarwar ta bayyana cewa bisa al’adun Masarautar Gaya, akwai wasu abubuwa da suka kebanta ga Sarki kaɗai, ciki har da kakaki, zaman karaga a fada, jiniya a mota da sauran al’adun masarauta.

Haka zalika ta ce dukkan hakiman da suke sanya karaga a fadojinsu su gaggauta cire ta, tare da daina amfani da ita.

Sanarwar ta buƙaci hakiman da su ci gaba da kiyaye ƙa’idoji da dokokin Masarautar ta Gaya.