Masarautar Kano ta dakatar da Hawan Dawakai yayin bikin Sallah

Majalisar masarautar kano ta sanar da janyewa daga dukkan shirye-shiryen gudanar haye-hayen bikin babbar sallah na bana.
‎
‎Masarautar Kano ta bayyana hakan ne ta bakin babban ɗan majalissar Sarki kuma Matawallen Kano Alhaji Aliyu Ibrahim.
‎
‎Ya bayyana cewa, an ɗauki matakin ne bayan samun shawarwari daga jami’an tsaro domin tabbatar da zaman lafiya da kwanciyar hankali a faɗin jihar Kano yayin bukukuwan Sallah.
‎
‎Matakin na zuwa ne bayan Rundunar Ƴan sandan Kano ta sanar da dakatar da duk wasu harkokin hawan Sallah saboda dalilan tsaro.
‎
‎A baya dai ana sa ran Sarkin Kano Muhammadu Sanusi na biyu zai gudanar da hawan Daushe tare da hakimai da sauran mahaya yau Alhamis kafin sanar da janye hawan.
‎

Matawallen Kano Alhaji Aliyu Ibrahim, ya bukaci daukacin al’umma da suyi hakuri tare da gudanar da adduoi na musamman don samun dorewar zaman lafiya a jihar nan dama kasa baki daya.
‎