Masu cewa a kamani ba su san ciwon kansu ba – Sheikh Gumi

Fitaccen malamin addinin Islaman nan da ke Kaduna Sheikh Ahmad Gumi ya soki wadanda ke kiraye-kirayen cewa a kama shi sakamakon ganawa da ya ke yi da ‘yan bindiga.

Shehin malamin ya bayyana masu kiraye-kirayen da cewa ba su san ciwon kansu ba, yana mai cewa, taron da ya yi da ‘yan bindigar, jami’an gwamnati ma sun halarta.

A yayin zantawa da jaridar Daily Post, Sheikh Gumi ya ce ba shi ne mutum na farko da ya fara ganawa da ‘yan bindiga ba a kasar nan.

‘‘Ko da gwamnan jihar Kaduna ya gana da su shi ma takwaransa na jihar Zamfara ya gana da su, saboda haka me ya sa sai nawa ne zai zama abin magana?’’ a cewar Shehin Malamin.

‘‘Ni ba nine mutum na farko da na zanta da ‘yan bindiga ba. Kawai dai na bi sahun abin da wasu su ka yi ne, a matsayi na daya daga cikin malaman addini’’ inji Sheikh Gumi.