Monguno: Muna daf da kawo karshen rashin tsaro a Najeriya

Fadar shugaban kasa ta sha alwashin yin duk me yiwuwa wajen ganin ta kawo karshen rashin tsaro da ke addabar sassa daban-daban Najeriya nan ba da jimawa ba.

Mai bai wa shugaban kasa shawara kan harkokin tsaro manjo janar Babagana Monguno mai ritaya ne ya bayyana haka bayan kammala wani taro kan harkokin tsaro da shugaban kasa ya yi jiya a fadar asorok.

A cikin wata sanarwa da ofishin mai bai wa shugaban kasa shawara kan harkokin tsaron ta fitar, ta ce, an dage ci gaba da tattaunawa da shugaban kasar ya fara a jiya da masu ruwa da tsaki kan harkokin tsaron zuwa ranar talata na makon gobe don ci gaba da neman hanyoyin da za abi don magance matsalolin da ke addabar Najeriya.

Ya ce, bako shakka gwamnati ta damu matuka game da halin da ake ciki kuma tana ci gaba da tuntubar masu ruwa da tsaki da nufin lalubo hanyoyin da za a dakile matsalar.