Mun cafke gawurtaccen mai garkuwa da mutane a kano – Bijilanti

Rundunar tsaron Sintiri na Bijilante reshen jihar Kano ta ce, ta cafke wani mutum da ya jima yana yin garkuwa da mutane.

Babban Kwamandan rundunar na jiha Muhammad Kabir Alhaji ne ya bayyana hakan ga Freedom Radio.

A cewar sa, sun kama mutumin mai suna Sada Lawal ne a garin Gomo da ke ƙaramar hukumar Sumaila a lokacin da ya yi ɓadda-bami a cikin almajiran wata makaranta.

Muhammad Alhaji ya ce, binciken su ya gano cewa, Sada Lawan ya jima yana addabar mutane ta hanyar garkuwa da su a yankin Sumaila da kewaye.