Mun kaɗu da ficewar Abba Gida-gida – PDP

Jam’iyyar PDP reshen jihar Kano ta bayyana kaɗuwarta kan ficewar Engr. Abba Kabir Yusuf daga jam’iyyar.

Sakataren yaɗa labaran jam’iyyar na Kano Bashir Sanata ne ya bayyana hakan a zantawarsa da Freedom Radio.

Sanata ya ce, yanzu haka suna cikin alhini da takaici kan ficewar Abban daga jam’iyyar.

“Mutumin da ya samu ƙuri’u sama da miliyan guda, sannan a ce ya bar jam’iyyarka ai zai wahala a maye wannan giɓin”.

Ƙarin Labarai

Abin da ya sanya na fice daga PDP – Abba Gida-gida

Haryanzu Kwankwaso na nan a PDP-Bashir Sanata

Ya ci gaba da cewa “Muna kira ga sauran ƴan jam’iyyar da ke neman a rushe shugabanci su zo a haɗa kai domin a ciyar da jam’iyyar gaba”.

“Halin da ake ciki yanzu akwai takaici, har tsoron buɗe wayoyinmu muke domin saƙonnin da muke gani na yadda mutane masu amfani ke ficewa daga PDP” a cewarsa.

A ranar Lahadi ne Abba Kabir Yusuf wanda ya yiwa PDP takarar Gwamnan Kano a shekarar 2019 da wanda yayi masa mataki Aminu Abdussalam Gwarzo suka sanar da ficewarsu daga jam’iyyar.

Sun kuma bayyana shiga jam’iyyar NNPP mai alamar kayan marmari.