Mun shiga bincike don gano waɗanda suka kashe Abdulkarim Na’Allah – Ƴansanda

Rundunar ƴansandan jihar Kaduna ta ce, ta shiga bincike kan kisan gillar da aka yiwa Abdulkarim Ibn Na-Allah mai shekaru 36, ɗa ga Sanata Bala Na’Allah.

A wata sanarwa da mai magana da yawun ƴan sandan jihar ASP. Muhammad Jalige ya ce, ƴan bindiga sun shiga gidan marigayin da ke unguwar Malali, inda suka hallakashi.

Kazalika ƴan bindigar sun tafi da motarsa ƙirar Lexus SUV, wadda har yanzu ba a kai ga ganota ba. ASP. Jalige ya ce, marigayin ƙwararren matuƙin jirgin sama ne, saɓanin labarin da ake yaɗa wa, na cewa marigayin Kyaftin ɗin soja ne.

A ƙarshe rundunar ƴansandan ta miƙa saƙon ta’aziyyarta ga iyalai da ƴan uwan marigayin.