Mutane 3 sun jikkata yayin da shaguna suka kone sakamakon gobarar motar dakon Gas a Zaria

Mutane uku sun jikkata yayin da wasu shaguna suka kone  Kurmus sakamakon tashin gobara a wata motar dakon gas a yankin Kwangila da ke Karamar Hukumar Zaria ta  Jihar Kaduna.

Hakan  na kunshe a  cikin sanarwar da hukumar kiyaye hadurra ta kasa FRSC reshen jihar ta fitar.

Sanarwar ta ce motar wadda ke dauke da iskar gas ta kama da wuta ne yayin da take ajiye a gefen hanya a kan hanyar Funtua zuwa Zariya.

Haka zalika  ta ce gobarar ta shafi shagunan da ke kusa tare da jikkata mutane uku da aka kai asibiti domin samun kulawa.

FRSC ta  ce jami’an agajin gaggawa sun samu nasarar shawo kan gobarar tare da dakile yaduwarta zuwa wasu wurare.

Hukumar ta bukaci masu ababen hawa da su yi taka-tsantsan yayin wucewa yankin tare da bin umarnin jami’an tsaro.