Mutane 8 sun rasa ransu a wasan Kamaru

A ƙalla mutane 8 ne suka rasa ransu sakamakon wani turmutsutsu da ya faru yayin wasan Kamaru da kasar Komoros a gasar cin kofin Afrika da ake gudanarwa a kasar.

An buga wasan ne a ranar Litinin 24 ga watan Janairun shekarar 2022.

An kuma buga wasan a katafaren filin wasan kasar mai suna Olembe dake Yaounde babban birnin kasar.

Kazalika rahotonni sun tabbatar da cewa mutane da dama ne suka samu raunuka yayin turmutsutsun da akayi.

Hukumar kwallon kafar kasar ta tabbatar da faruwar lamarin ta cikin wata sanarwa data fitar a safiyar yau Talata 25 ga watan Janairun 2022.

Ta kuma ce yanzu haka tana nan tana gudanar da bincike kan al’amarin.