Watford ta Sallami Claudio Ranieri daga aikin horas da kungiyar

Watford Ta Sallami Claudio Ranieri Daga Aikin Horas da ‘Yan Wasan Kungiyar

Kungiyar kwallon kafa ta Watford ta sallami mai horas da ‘yan wasan kungiyar, Claudio Ranieri bayanda ya jagoranceta wasanni 14 a kasa da watanni 4.

Tun bayan da mahukuntan kungiyar ta Watford suka nada Ranieri mai shekaru 70 dan asalin kasar Italiya jan ragamar kungiyar a ranar 4 ga watan Oktoban shekarar 2021 maki bakwai kacal ya iya ciwowa a gasar Pirimiyar kasar Ingila.

Ko a ranar Juma’ar data gabata Watford karkashin jagorancin Ranieri tayi rashin nasara a hannun kungiyar kwallon kafa ta Norwich City da ci Uku da nema, wanda hakan yasa ta koma cikin kungiyoyi ukun karshen teburin gasar Pirimiya.