Na matsu na sauka daga mulkin Nijeriya- Shugaba Buhari

Shugaban Nijeriya Muhammadu Buhari, ya sake nanata cewa ya ‘kagu ya bar karagar mulki.

Shugaba Buhari, ya furta hakan ne yayin da ya ke yin bankwana da jakadiyar Amurika a Nijeriya mai barin gado Mary Beth Leonard, a fadar mulki ta Aso Villa da ke birnin tarraya Abuja.

Haka kuma ya ce, tini ya kammala shirinsa na komawa domin ci gaba da aikin kula da gonarsa wadda ke da dabbobi fiye da dari uku a mahaifarsa da ke garin Daura na jihar Katsina.

A baya dai an sha jiyo shugaban na cewa a kullum yana kirgen kwanakin da suka rage masa ya mika mulki a ranar 29 ta watan Mayu mai zuwa.