Najeriya da Haɗaɗɗiyar Daular Larabawa za su dawo da zirga-zirgar jiragen sama

Gwamnatin tarayya ta bayyana yiwuwar dawo da zirga-zirgar jiragen sama tsakanin Najeriya da hadaddiyar daular Larabawa.

Wani jami’i a kwamitin yaki da cutar corona na shugaban ƙasa Mukhtar Muhammad ne ya sanar da hakan a wani taron manema labarai.

Ya ce ƙasashen biyu sun amince da ƙa’idojin yin tafiye-tafiye da kuma sharuɗɗan da gwamnatin haɗaɗɗiyar daular larabawa ta sanya.

Jaridar the Cable ta rawaito cewa Mukhtar Muhammad ya kuma ce, gwamnatin tarayya ta amince ga buƙatar gwajin COVID-19 da gwamnatin Hadaddiyar Daular Larabawa ta sanya a baya a cikin Maris 2021 don kiyaye yaɗuwar ta.

An dakatar da zirga-zirgar jiragen sama kai tsaye tsakanin kasashen biyu a watan Maris saboda batutuwan da suka shafi yarjejeniyar COVID-19.