NFF ta alakanta jinkirin biyan albashin ‘yan wasa da annobar Corona

Hukumar kwallon kafa ta kasa NFF ta alakanta tsaikon da aka samu na rashin biyan ‘yan wasa da masu horarwa kudadensu akan lokaci da matsalar karancin kudaden shiga da annobar Corona ta haifar a kasar.

Barkewar cutar Corona dai ya sanya harkokin wasanni da kasuwanci tsayawa cak a fadin duniya a shekarar da ta gabata, lamarin da hukumar ta ce ya kawo mata tsaiko ta fannin karancin kudaden gudanarwa.

A wata tattaunawa da mai tsaron bayan kungiyar kwallon kafa ta Najeriya Leon Balogun yayi da manema labarai, ya bayyana yadda ‘yan wasan da masu horarwa ke bin hukumar bashin kudaden da dama.