NNPC: Za mu iya sanya Naira biliyan 12 ne kacal a asusun tarayya a watan Yuni

Kamfanin mai kasa (NNPC) ya shaidawa gwamnatin tarayya da gwamnonin kasar nan dalilan da ke sanyawa ba ya sanya kudade masu yawa a asusun tarayya.

Kamfanin NNPC ya kuma alakanta lamarin da biyan kudin tallafin man fetur da ya ke yi.

A cikin wata wasika da shugaban kamfanin na NNPC Malam Mele Kyari ya rubutawa gwamnonin, ta ce, biyan kudaden tallafin mai shine ya cinye mafi yawa na kudaden da kamfanin ke samu.

Kamfanin NNPC ya kuma ce a watan Yuni zai iya sanya naira biliyan goma sha biyu da miliyan dari tara da sittin da shida ne kawai a asusun tarayya idan ya biya kudin tallafin mai.