Rashin tsaro ne babban ƙalubalen da gwamnatin Buhari ta fuskanta a 2021 – Lai Muhammad

Gwamnatin tarayya ta ce rashin tsaro ne babban ƙalubalen da ta fuskanta a shekarar 2021.

Ministan yaɗa labarai da raya al’adu Alhaji Lai Muhammad ne ya bayyana hakan yau, yayin taron manema labarai a Abuja.

Lai Muhammad ya yi tsokaci kan nasarorin da gwamnatin shugaba Muhammadu Buhari ta samu a bana.

Daga cikin nasarorin da gwamnatin tarayya ta samu har da hallaka ‘yan ta’adda sama da dubu ɗaya da sojojin ƙasar nan suka yi tare da ceto rayukan mutane dubu biyu.

Sai kuma yadda wasu ‘yan ta’adda sama da dubu ashirin da biyu da suka ajiye makamansu tare da miƙa wuya ga jami’an tsaro a yankin arewa maso gabashin ƙasar.