Riga-kafin Corona: Ba a samu rasa rai ko daskarewar jini a Najeriya ba – WHO

Gwamnatin tarayya da hukumar lafiya ta duniya (WHO) sun ce tun da aka fara yin allurar riga-kafin cutar corona ta Astrazaneca a Najeriya, ba a samu labarin rasa rai ko daskarewar jini ba.

Shugaban hukumar kula da lafiya a matakin farko Dr. Faisal Shuaib ne ya bayyana haka yayin wani taron manema labarai a ranar juma’a a Abuja.

Sai dai a cewar sa, an samu labarin ciwon jiki, amai, gudawa, ciwon kai, kasala da zazzabi da dan sauran wasu kunji-kunji a wasu jihohi biyar.

Jihohin da aka fi samu korafin sun hada da: Lagos, Kaduna, Yobe, Kebbi da kuma Cross River.

An dai fara allurar rigakafin ta Astrazaneca a Najeriya a ranar goma sha biyar ga watan jiya na Maris.