Rundunar ƴan sandan jihar Adamawa ta kama masu laifi sama da dubu 1

Rundunar ƴan sandan jihar Adamawa ta kama sama da mutane 1, 700 da suka aikata laifu daban-daban.

Kwamishinan ƴan sandan na jihar Aliyu Adamu ne ya bayyana hakan, a wani ɓangare na bankwana da rundunar sakamakon sauyin wajen aiki da ya samu.

Ya ce, rundunar ta kama sama da mutane 1,700 da suka aikata laifin garkuwa da mutane , fyaɗe, fashi da makami, masu Safarar miyagun ƙwayoyi da sauran su.

Cikin abubuwan da rundunar ta ƙwato sun haɗa da bindiga ƙirar AK47 guda 20 sai tarin ƙwayoyin maye irin su tabar Wiwi da sauran su.

Aliyu Adamu ya ce, tuni an gurfanar da su a gaban kotu don yanke musu hukunci daidai da abinda suka aikata.