Rundunar Sojin kasar nan ta gargadi Sheikh Gumi da ya rika kyautata kalamansa

Rundunar sojin kasar nan ta ce babu kanshin gaskiya cikin zargin da ke cewa tana turawa da jami’anta zuwa aikin tabbata da tsaro ne bisa tsarin addini ko kabila

Mai magana da yawun rundunar Burgediya Janar Muhammed Yerima ne ya bayyana haka ta cikin wata sanarwa da ya fitar a jiya litinin.

Muhammed Yarima ta cikin sanarwar dai ya ce, rundunar ta fitar da sakon ne don mai da martani kan kalaman da Shehin malamin ya yi abaya-bayan nan.

‘‘Saboda haka rundunar soji tana gargadin Sheikh Gumi da ya guji furta irin wannan kalamai da ke bata mata suna’’.

‘‘Duk wani aiki da rundunar sojin kasar nan za ta yi tana yinshi ne bisa kwarewa da sanin ya kamata saboda haka wani mutum yazo ya ce wai rundunar tana amfani da addini ko kabila wajen aiwatar da ayyukanta batu ne kawai marar tushe da bashi da makama’’ a cewar Yarima.

Rahotanni sun ce Sheikh Gumi dai ya yi zargin cewa rundunar sojin kasar nan tana turawa da sojoji wadanda ba musulmi ba don yaki da ‘yan bindiga da ke aikata ta’asa a yankin jihohin arewa maso yamma.