Rundunar ‘yan sandan Bauchi ta kama mutane 7 da ake zargin ‘yan fashi ne

Rundunar ‘yan sandan jihar Bauchi ta kama wasu mutane 7 da ake zargin ‘yan fashi ne a maboyar su dake unguwar Magaji.

Rundunar ‘yan sandan ta ce, wadanda ake zargin ba su wuce tsakanin shekaru 17 zuwa 25 ba, kuma an same su da makamai masu hatsari da kuma barasa’.

A wata sanarwa da jami’in hulda da jama’a na rundunar ‘yan sandan jihar Bauchin Ahmed Mohammed Wakil ya fitar, tace ‘wadanda ake zargin sun hadar da Rayyanu Mohammed, Mustapha Harisu, Yusuf Ibrahim, Mubarak Lawal, Abubakar Musa, Al-Amin Hussaini da kuma Hamza Umar’.

Kamen dai ya biyo bayan bayanan sirri da rundunar tace ta samu tare da hadin guiwa da jami’an sa kai.

A cewar jami’in hulda da jama’a na rundunar ‘yan sandan, ‘binciken farko ya nuna wanda ake zargin ‘yan wata kungiya ne mai suna Sara Suka dake gudanar da ayyukan su a cikin kwaryar birnin Bauchi’.

Rahoton: Abdulkadir Yusuf Gwarzo