Sarkin Musulmi ya sanar da ganin jinjirin watan Ramadan

Mai alfarma Sarkin Musulmi, Alhaji Sa’ad Abubakar III, ya ba da sanarwar ganin watan Ramadan na bana

Hakan na nufin za a fara azumin watan Ramadan gobe Litinin a Nijeriya.

Sarkin Musulmin, wanda kuma shi ne Shugaban Majalisar Koli ta Harkokin Addinin Musulunci a Najeriya NSCIA, ya ce, “Yau Lahadi, 29 ga watan Sha’aban, Hijira 1445, daidai da 10 ga watan Maris, 2024, an kawo karshen watan Sha’aban.

“Mun samu labarin ganin watan Ramadan daga shugabanni da kungiyoyin addinin musulunci a wurare da yawa a kasar nan, kuma kwamitocin ganin wata sun tantance sahihancin bayanan.