Shugaban Majalisar wakilai ya buƙaci ministoci da masu riƙe da muƙaman siyasa su bayyana ayyukan da suka gudanar

Shugaban Majalisar Wakilan Najeriya, Tajuddeen Abbas, ya buƙaci ministoci da sauran masu riƙe da muƙaman siyasa a gwamnatin Shugaba Bola Ahmed Tinubu da su bayyana ayyukan da suka gudanar, ya na mai cewa nuna biyayya ga shugaban ƙasa ba tare da ayyukan da za a iya gani ba, ba zai ƙara gamsar da ’yan kasa ba.

Tajuddeen Abbas, ya bayyana hakan ne a Abuja, inda ya sanar da shirin ƙirƙirar tsarin tattara bayanan ayyukan gwamnati mai suna PBAT Stewardship Account.

Ya buƙaci masu riƙe da muƙaman siyasa su gabatar da rahoton ayyukansu cikin kwanaki 90, tare da bai wa al’umma damar tantance ayyukan da aka gudanar.

Ya kuma bayyana cewa shi da kansa zai gabatar da rahoton ayyukan da ya taimaka aka gudanar a mazaɓarsa ta Zariya, Jihar Kaduna, Arewa maso Yamma da Najeriya baki ɗaya cikin kwanaki 14.