Siyasar kabilanci da addini ta janyo koma baya a zaben bana- ACF

Kungiyar tuntuba ta Arewa Consultative Forum ta yi zargin cewa siyasar kabilanci da bambancin addini da wasu suka nuna a zabukan da aka kammala a baya-bayan nan, sun taimaka wajen haddasa rashin fitowar mutane domin yin zaben.

Sakatare janar na kungiyar Murtala Aliyu ne ya bayyana hakan, ta cikin wata sanarwa da ya fitar mai taken magance matalolin da aka fuskanta yayin zabe, don kaucewa sake afkuwarsu a nan gaba.

Sanarwar ta jinjinawa wadanda suka garzaya Kotu domin neman hakkokin da suka ce an tauye musu yayin zaben, maimakon su bi wata hanya da ka iya janyo wa kasar matsala.

Murtala Aliyu ya kara da cewa matukar ba a hanzarta kawar da wannan matsala ta bangaranci da bambancin addini a cikin siyasar kasar nan ba, to hakika tamkar an fara gini ne da tubalin toka.

Rahoton: Abdulkarim Muhammad Abdulkarim