Sojin Nijeriya ta gargadi Sojin kasar kan takun sakar Nijar da ECOWAS

Rundunar Sojin Najeriya ta yi wa dakarunta kashedi dangane da takun sakar da ke tsakanin gwamnatin Sojin Jamhuriyar Nijar da kungiyar raya tattalin arzikin kasashen yammacin Africa ta ECOWAS.

Babban hafsan dakarun sojin kasarnan Lt. Janar Taoreed Lagbaja ne yayi wannan gargadi a yayin wata ziyara daya kaiwa dakarun runduna ta 8 dake jihar Sakkwato wadda jihar ke daya daga jihohin da ke makwabtaka da Jamhuriyar Nijar, inda ya bukaci koda yaushe su kasance cikin shirin ko-ta-kwana, saidai su guji afkawa ba tare da umarni ba

Wannan gargadi dai ya biyo bayan labaran kanzon kurege wasu ke yadawa barkatai a shafukan Sada zumunta na yanar gizo, game da batun.

Takun-saka da ke wanzuwa tsakanin Jagororin Gwamnatin Soji da ta yi juyin mulki a Jamhuriyar da kungiyar ta ECOWAS, na ci gaba da sanya fargaba da rashin tabbas tsakanin al’ummun kasashen biyu musamman a jihohin da kasashen ke makwabtaka da juna.

Rahoton: Mukhtar Abdulkadir Birnin Kudu