Sojoji sun hallaka ƴan bindiga tare da ceto mutane 20

Jami’an rundunar Sojin Nijeriya, na Operation Hadarin Daji, sun hallaka wasu masu garkuwa da mutane tare da ceto wasu mutane 20 da suka sace a jihar Zamfara.

Ta cikin wata sanarwa da mai magana da yawun rundunar sojin na Operation Hadarin Daji Kaftin Ibrahim ya fitar a jiya Talata.

Kaftin Ibrahim, yace dakarun nasu sun sami nasarar ceto mutanan ne kimanin 20 ba tare da wani daga cikin su ya samu wani rauni ba ko kadan.

A cewarsa daga cikin wadanda suka hallaka akwai kasurgumin mai satar mutanan nan da ake kira da suna Sainaje.

Kaftin Ibrahim ta cikin sanarwar yace, dakarun Operation Hadarin Daji sun kai farmaki ne wani guri da ake kyautata zaton maboyarsu ce a Rukudawa,Dumburum, Tsanu, Birnin Tsaba, Magare da kuma Shamushelle dake Zurmi dukan su a karamar hukumar Birnin Magaji a jihar ta Zamfara.