Rundunar Sojin kasar nan, ta ce dakarunta sun ceto mutane 15 da aka yi garkuwa da su, tare da kama wasu mutane biyu da ake zargi da aikata garkuwa da mutane, a wasu hare-haren da ta gudanar a jihohin Edo, Kaduna, Benue, Kogi da Plateau.

Rundunar ta ce dakarunta sun gudanar ayyukan ne a ranakun 1 da 2 ga Oktoban da muke ciki, bayan wani samame da sintiri a wasu wurare da ake zargin ‘yan bindiga na fakewa.

A jihar Edo, dakarun Bataliya ta 195 sun ceto wasu mutane uku bayan da suka mayar da martani ga rahoton sace mutane da aka kai musu a hanyar Ekor zuwa Ikakumo, a karamar hukumar Akoko-Edo.

Rundunar ta ce sauran ayyukan da aka gudanar a jihohin Kaduna, Benue, Kogi da Plateau sun taimaka wajen ceto wasu mutanen da aka yi garkuwa da su da kuma cafke wasu daga cikin wadanda ake zargi da hannu a ayyukan ta’addanci.

Rundunar Sojin ta ce dakarunta za su ci gaba da gudanar da samame da sintiri domin tabbatar da tsaron al’ummomi da kuma dakile ayyukan masu garkuwa da mutane.