Gwamnonin Arewa Maso Gabas sun amince da kafa tsarin sufuri ta jiragen sama

Gwamnonin jihohi shida na Arewa maso Gabashin Najeriya sun amince da kafa tsarin jigilar fasinjoji da kayayyaki ta jiragen sama.

Sanarwar da shugaban ƙungiyar gwamnonin yankin, kuma gwamnan jihar Borno, Farfesa Babagana Zulum, ya sanya wa hannu bayan taronsu karo na 13 a Maiduguri, ta ce matakan za su taimaka wajen rage kuɗin sufuri da bunƙasa tattalin arziki. Haka kuma, gwamnonin sun yi maraba da shirin samar da babura masu kafa uku 10,000, bas-bas 10 da motocin haya 300 masu amfani da wutar lantarki.

A ɓangaren tsaro da ilimi, gwamnonin sun yaba da ƙoƙarin jami’an tsaro wajen yaƙi da ta’addanci, tare da buƙatar ƙarfafa musayar bayanan sirri da haɗin gwiwa tsakanin jihohi. Sun kuma yi kira da a ƙara zuba jari a ilimi, samar da ayyukan yi ga matasa da kuma kammala manyan ayyukan more rayuwa a yankin.