Sojojin Najeria sun yi gwajin makaman cikin gida

Rundunar Sojin Ƙasar nan  ta gudanar da gwajin sabbin kayan aikin soja da aka ƙera a cikin gida, a sansanin sojoji na Jaji da ke jihar Kaduna, daga ranar 5 zuwa 8 ga Oktoba, 2026.

A sanarwar da Laftanar Kanal Polycarp Okoye ya fitar, Shugaban Rundunar Sojin Ƙasa, Laftanar Janar Waidi Shaibu, ya ce bincike da ƙere-ƙeren cikin gida na taimakawa wajen inganta kayan aiki da rage dogaro da ƙasashen waje.

Shaibu, wanda Manjo Janar G. M. Mutkut ya wakilta, ya ce gwajin zai tantance inganci da dacewar kayan aikin da yanayin ayyukan soja. Ya kuma buƙaci masu tantancewa su gudanar da aikinsu cikin ƙwarewa da adalci domin samun sakamako sahihi.

Cibiyoyin sojoji da kamfanoni masu zaman kansu sun gabatar da kayan aiki a gwajin, yayin da aka gwada manhajojin soja a Giri, Abuja.