Ta’addanci: Yan bindiga sun yi garkuwa da mutane 10 tare da kashe mutum 1 a jihar Niger

Wasu ‘yan bindiga sun kai hari a wasu kauyuka bakwai da ke cikin garin Gurmana a karamar hukumar Shiroro a jijar Naija, tare da kashe mutum daya sannan suka yi awon gaba da wasu 10.

Kauyukan da abin ya shafa su ne: Karibo, Shekadna, Kokki, Sarkin Zama, Bakin Kogi, Maganda da sauran Kauyukan da ke kusa da su duk a karkashin Gundumar Gurmana.

Hakimin Sarkin Zama da wasu da dama da suka samu raunuka sakamakon harbin bindiga a halin yanzu suna kwance a asibitoci daban-daban da ke Kuta shedkwatar karamar hukumar Shiroro.

Rahotannin sun bayyana cewa yan fashin sun zagaya cikin garuruwan akan Babura suna kona gidaje da rumbunan jama’a tare da yin harbi kan mai uwa da wabi.