Tallafa wa mabukata na kawo rahamar Ubangiji:   Dr Bashir Aliyu Umar

Babban limamin masallacin Alfurkan dake Alu Avenue a karamar hukumar Nasarawa, Dakta Bashir Aliyu Umar, ya ja hankalin mawadata da su rika tallafawa raunana a cikin al’umma musamman ma a wannan lokaci da ake fama da matsin rayuwa sanadiyyar annobar Covid 19.

Dakta Aliyu Umar, ya bayyana hakan ne yayin rabon tallafin kudi da kayan situru da gidauniya tallafawa mabukata watau Ramadan Trust Initiative ta gudanar a masallacin na Alfurkan.

Limamin ya ce nuna jinkai ga juna a cikin al’umma na daga cikin abunda ke kawo saukar jinkan Allah ga al’umma.

A nasa bangaren mataimakin sakataren kungiyar Malam Umar Muhammad, cewa ya yi, sun raba tallafin ne ga mata domin su ja jari domin su dogara da kansu.

Wakilin mu Abdulkarim Muhammad Abdulkarim Tukuntawa ya rawaito cewa fiye da mabukata 50 ne suka amfana da tallafin.