Tallafin Corona: An dakatar da kwamandan Hisbah na Dala

Hukumar Hisbah ta jihar Kano ta dakatar da kwamandan Hisbah na ƙaramar hukumar Dala Suyuɗi Hassan Muhammad.

Jami’in yaɗa labaran hukumar Ibrahim Lawal Fagge ne ya tabbatar da hakan ga Freedom Radio.

Fagge ya ce, babban kwamandan hukumar Hisbah na jiha ne ya dakatar da shi har tsawon wata guda.

Dakatarwar ta biyo bayan zargin salwantar da kayan tallafin Corona da aka bayar domin rabawa al’umma.

A ranar Juma’a ne aka yi zama da ɓangarorin masu ƙorafi domin kawo dai-dai-to ga me da lamarin, amma aka tashi baram-baram.