TINUBU GA BUHARI: Sai ka tashi tsaye domin jama’a na fama da talauci

Jagoran jam’iyyar APC na kasa Sanata Bola Ahmed Tinubu, ya ce, duk da cewa kasar nan ta fice daga kangin mashash-sharan tattalin arziki da ta shiga a baya, amma har yanzu tattalin arzikin Nigeria na cikin mawuyacin hali.

Madugun jam’iyyar ta APC ya bayyana hakan ne lokacin da ya ke gabatar da mukala a wajen taron lakca don tunawa da Sardaunan Sokoto Sir Ahmadu Bello wanda ya gudana yau asabar a garin Kaduna.

Tsohon gwamnan jihar ta Lagos ya ce duk da cewa gwamnatin shugaba Buhari ta yi namijin kokari wajen fitar da Nigeria daga mawuyacin halin da ta shiga, amma har yanzu da sauran rina a kaba.

Saboda haka a cewar Tinubu akwai bukatar shugaban kasar ya kara daura damara don rage radadin talauci da jama’a ke ciki.