Tsaro: Za mu ɗauki sabbin Kuratan ƴan sanda dubu 20 a ƙasar nan – IG Usman Alƙali

Sufeton ƴan sandan ƙasar nan Usman Alkali Baba ya ce nan ba da jimawa ba za a dauki ƙarin kuratan ƴan sanda dubu ashirin a faɗin ƙasar nan.

Usman Alƙali ya bayyana hakan lokacin da ya kai ziyara ga gwamnan jihar Oyo Seyi Makinde a ranar Talata.

Sufeton ya kuma ce, rundunar yan sandan Najeriya na buƙatar ƙari da kuma samar da kayayyakin aiki don yaki da matsalar tsaro.

Kazalika ya tabbatar da cewa tuni shugaban ƙasa Muhammadu Buhari ya amince da ɗaukan ƙarin sabbin jami’an ƴan sandan,duk da an samu jinkiri wajen fara ɗaukan su.

Har ma ya jaddada cewa kowacce ƙaramar hukuma a faɗin ƙasar nan za a ɗauki kuratan ƴan sanda kuma a ƙaramar hukumar ta su za su yi aiki.