‘Yan tadda sun kashe baturen ‘yan sanda a Sokoto

Wasu da ake zargin ‘yan tada kayar baya ne sun kashe wani baturen ‘yan sanda dake garin Madi cikin karamar hukumar Tangaza ta jihar Sokoto.

Har ila yau ‘yan bindigar sun kuma kashe wani jami’in dan sanda, inda daga bisani suka yi garkuwa da wasu matan wani hamshakin dan kasuwa a yankin.

‘Yan bindigar sun shiga yankin da misalin karfe 1 na daren jiya Laraba, inda suka yiwa ‘yan sandan kwanton bauna dai-dai lokacin da suke kokarin kubutar da wanda aka yi garkuwa da su.

Rahotanni na nuni da cewa ‘yan tada kayar bayan sun kuma tsere da bindigogin jami’an ‘yan sandan bayan kashe su.