Wata kila Chukwueze ba zai bugawa Najeriya wasa ba

Dan wasa Najeriya dake taka leda a kungiyar kwallon kafa ta Villarreal Samuel Chukwueze zai fara daukar matsakaicin horo a ranar bakwai ga watan Maris bayan kammala yi masa aiki sakamakon rauni da ya samu.

Chukwueze ka iya rasa wasannin da Najeriya zata kara da Benin Republic da kuma Lesotho a wasannin share fagen gasar cin kofin Afrika ta shekarar 2021 da za a gudanar a ranar 22 da 30 ga watan Maris.

Kwararran likita Dakta Ulrike Muschaweck ne ya yiwa Chukwueze aikin a birnin Munich dake a kasar Jamus.

Rahotanni na cewa rashin Chukwueze a wasannin ka iya kawowa Najeriya tasgaro yayin da take neman a kalla maki uku a wasannin guda biyu.

Chukwueze dai ya yi nasarar cin kwallo biyu tare da taimakawa wajen cin guda biyar a wasanni ashirin da biyu da ya bugawa Villarreal a wannan kakar wasan da muke ciki.