Wuta na cigaba da ruruwa a jam’iyyar APC mai mulki a Kano

Rikicin da ya dabaibaye jam’iyyar APC mai mulki a Kano ya kara fadada yayin da shugabanni biyu suka lashe zabe daga bangarorin jam’iyyar biyu.

Tuni dai aka rantsar da Abdullahi Abbas, a matsayin sabon shugaban jam’iyyar daga tsagin gwamnan Kano Abdullahi Umar Ganduje, bayan lashe zaben da kuri’u dubu uku da dari da ashirin biyu.

To sai dai wani tsagi na jam’iyyar karkashin jagorancin Sanata Ibrahim Shekarau ya zabi Ahmadu Haruna Danzago, a matsayin shugaban jam’iyyar.

Dan majalisar Wakilai mai wakiltar Karamar hukumar Birnin Kano Sha’aban Ibrahim Sharada, ya ce hukunci ya rage na uwar jam’iyyar ta kasa wajen yadda da shugaban jam’iyyar da zata amince da shi.