Yadda gwamnati ta bankaɗo gidan Mari a Kano

Gwamnatin jihar Kano ta bankaɗo wata makarantar mari a unguwar ƴar Akwa da ke Na’ibawa.

Kwamishinan harkokin addinai Muhammad Tahar Baba Impossible ne ya bayyana hakan, lokacin da ya kai sumame gidan a ranar Alhamis.

“Mun samo rahoto kan yadda ake ɗaure mutane a wannan makaranta, don haka muka ɗauko tawagar mu da jama’an tsaro don mu gani, kuma ga shi mun zo mun tarar da matasa da yara a ɗaure” in ji Baba Impossible.

“Jihar Kano mu ma mun yi biyayya ga umarnin shugaban ƙasa Muhammadu Buhari na haramta gidajen mari a ƙasar nan, don haka babu wanda yake da hurumin sake sanya mutane a mari”.

Kwamishinan ya ce, a yanzu sun samu sama da mutane 47 da ke ɗaure a gidan marin, kuma za su wuce da su don lalubo iyayen su tare da ɗaukan mataki na gaba.

“Bayan mun zo malamin da yake da alhakin kula da makarantar yayi ƙoƙarin musanta cewa shi bai san da makarantar ba, don haka a matsayin mu na gwamnati za mu ɗaukin da ya dace akan laifin da ya aikata”.

Shi ma mai magana da yawun rundunar ƴan sandan jihar Kano DSP Abdullahi Haruna Kiyawa ya ce, sun miƙa malamin zuwa sashin binciken manyan laifuka don faɗaɗa bincike.