‘Yancin Mata na raguwa a Duniya – MDD 

Rahoton Majalisar dinkin Duniya ya bayyana cewa mata a duniya suna da kashi 64 cikin 100 na ‘yancin doka idan aka kwatanta da maza. Rahoton ya ce duk da ci gaban da aka samu, har yanzu mata da ‘yan mata ba su da daidaito da maza a karkashin doka a kasashe da dama.

Rahoton ya kuma nuna cewa a wasu wurare dokoki suna takaita ‘yancin mata, yayin da wasu kasashe ba su da dokokin da ke tabbatar da daidaiton albashi ko kare mata daga cin zarafi. Duk da haka, an samu dan ci gaba domin kasashe da dama sun kafa dokoki kan lamarin.

Sakataren Janar na Majalisar Dinkin Duniya, António Guterres, ya ce tabbatar da adalci ga mata da ‘yan mata na da muhimmanci wajen gina al’umma mai adalci da ci gaba.