Yanzu-yanzu- Ƴan bindiga sun sako ɗaliban Tagina

Ƴan bindiga sun sako ɗaliban islamiyya Salihu Tanko da ke garin Tagina a jihar Neja.

Shugaban ƙaramar hukumar Rafi ta jihar Neja Alhaji Isma’il Musa Ɗan Modibbo ya tabbatar da kuɓutar su a zantawar sa da wakilin mu Nuruddeen Isyaku Daza.

Alhaji Isma’il Musa ya ce, an samu dukkanin ɗaliban, ba tare da rasa ko da guda ba.

Tun da fari, Jaridar PRNigeria ta rawaito cewa, wata majiya daga jami’an tsaro ta shaida cewa ɗaliban sun kuɓuta a yammacin Alhamis din nan.

Idan za a iya tunawa sama da ɗaliban islmaiyyar 70 ne masu garkuwa da mutane suka sace a watan Yuni.

Rahotanni sun bayyana cewa, yanzu haka ɗaliban na kan hanyar su ta Kagara zuwa Minna daga Birnin Gwari, bayan shafe kwanaki 88 a hannun ƴan bindigar.