Za mu ɗauki sabbin likitoci aiki – Ganduje

Gwamnatin jihar Kano ta ce ta fara shirye-shiryen daukar sabbin likitoci guda hamsin da shida aiki.

A cewar gwamnatin hakan zai taimaka gaya wajen bunƙasa harkokin kula da lafiya a cibiyoyin lafiya da ke matakin farko.

Hakan na cikin wata sanarwa ce mai dauke da sa hannun mai magana da yawun hukumar kula da lafiya a matakin farko Maikudi Marafa.

Sanarwar ta ce, tuni aka fara yin gwaji ga likitocin da suka nuna sha’awar aikin.

A cewar sanarwar shugaban hukumar kula da lafiya a matakin farko ta jihar Kano, Dr. Tijjani Hussain, ya shawarci likitocin da su ka nuna sha’awar aiki da gwmanatin jihar da su shirya tunkarar jan aiki dake gabansu.