Za mu bayar da tallafin kayan noma ga manoman jihar kano

Gwamnatin jihar Kano ta ce yanzu ta kammala shirin bayar da tallafin kayan noma ga al’umma jihar kano musamman a wannan lokaci da damina take daf da sauka domin samarwa da manoma saukin taki a wannan lokaci.

Gwamnan jihar Injiniya Abba Kabir Yusuf ne ya bayyana hakan da safiyar yau yayin da ya karɓi baƙuncin sarkin Bichi Alhaji Nasiru Ado Bayero a fadar gwamnatin Kano cikin wani ɓangare na bikin sallah ƙarama.

Gwamna Yusuf ya kuma ce yanzu haka shirin samar da takin zamani da za’a bawa manoma yayi nisa domin samar da anfanin noma a kano.

Da yake jawabi tun da fari sarkin Bichi Alhaji Nasiru Ado Bayero kira yayi ga gwamnatoci da suyi duba da tunkarowar damuna wajen tallafawa manoma dake faɗin jihar nan dama ƙasa baki ɗaya.

Haka zalika gwamnatin kano tace zata tabbatar da cewa ta shiga lunguna da saƙo na jihar kano domin ganin ta tallafawa manoma.