Za mu rufe duk tashar da ta karya dokar mu- NBC

Hukumar kula da kafafen yada labarai ta Nijeriya NBC, ta ce za ta rufe duk wata tasha da ta karya dokar hukumar.

Mai magana da yawun hukumar Mista Ekanem Antia, ne ya bayyana haka ta cikin wata sanarwar da hukumar ta fitar.

Ya ce, hukumar za ta rufe duk wata kafar yaɗa labarai da ta yada kalaman tunzuri yayin zaben da ke ƙaratowa.

Sanarwar ta kara da cewa, babban daraktan hukumar, Malam Balarabe Ilelah, ne ya bayar da wannan gargadi domin ankarar da kafafen yada labarai.

Haka kuma ya ƙara da cewa irin wadannan kalamai da wasu gidajen yaɗa labarai ke yi na tayar da zaune tsaye.

Hukumar ta NBC ta kuma yi gargadi ga gidajen yada labarai tana mai cewa ba za ta yi kasa a gwiwa ba wajen rufewa ko kuma kwace lasisin wadanda suka karya dokar.