Za’a koyar da fursunoni arba’in karatun Firamare

Sama da Fursunoni arba’in da hudu ne zasu fara karatun Firamare a gidan gyaran hali dake Goron Dutse a jihar Kano.

Shugaban hadakar kungiyar masu Koyarda Ilimin manya ta kasa Reshen jihar Kano Alhaji Garba Magaji ne ya bayyana hakan lokacin bikin bude ajujuwan koyar da  mazauna gidan gyaran hali dake Goron Dutse a yau.

Alhaji Garba Magaji ya kara da cewa sun dauki matakin koyarda mazauna gidan gyaran halin ne domin inganta rayuwarsu domin kada suyi zaman banza a gidan.

Wakilin mu Abdulkarim Muhammad Abdulkarim Tukuntawa ya ruwaito cewa karatun kammala firamare din zai dauki watanni uku kacal ana koyar dasu.