Zargin Yin Barazana: Ƴan sanda sun gayyaci Malam Abduljabbar

Rundunar ƴan sandan jihar Kano ta gayyaci Malam Abduljabbar Kabara, kan ƙorafin da shugaban Izala na jihar Dr. Abdullahi Saleh Pakistan yayi a kansa.

Da maraicen Asabar ɗin nan, jami’in hulɗa da jama’a na rundunar DSP. Abdullahi Haruna Kiyawa, ya shaida wa Freedom Radio cewa, an gayyaci malamin don ya bayyana a ranar Litinin mai zuwa.

A cewar sa, dama an ɗage wannan gayyatar ne, saboda zaman muƙabalar da aka yi da shi a ranar Asabar.

Tun a baya ne shugaban ƙungiyar Izalar Dr. Abdullahi Pakistan, ya shigar da ƙorafi gaban rundunar ƴan sandan, kan zargin Malam Abduljabbar da yin wasu kalamai da ke yi masa barazana ga rayuwa.

Wanda ƴan sanda suka ce, sun shiga bincike tun a kai.