Ƴan soshiyal midiya na tsokaci kan tuhumar kisan kai ga tsohon soja

Masu amfani da kafafen sada zumunta na ci gaba da yin Alla-wadai kan wani tsohon soja da aka kama bisa zargin yin garkuwa da wanin ƙanƙanin yaro.
Ƴan sanda sun cafke tsohon sojan mai suna Sani Galadima ne a unguwar Badarawa da ke Kaduna, bisa zargin yin garkuwa da ɗan maƙocinsa tare da hallaka shi bayan ya karɓi kuɗin fansa.

Rahotanni sun ce, Galadima ya yi amfani da wani matashi wajen satar ƙaramin yaron, sannan suka nemi kuɗin fansa.
Mahaifin yaron Alhaji Kabiru Magayaki ya biya kuɗin fansar har miliyan biyar.

Sani Galadima na cikin waɗanda suka riƙa zuwa har gida domin yin jaje ga mahaifin yaron.
Waɗanda ake zargin sun shaidawa ƴan sanda cewa, sun hallaka yaron tare da jefa shi a wata magudanar ruwa da ke Kano, saboda ya gane ɗaya daga cikin su.

Ƙarin Labarai:

Ko ‘Da na ‘yan bindiga su ka yi garkuwa da shi ba zan basu kudin fansa ba – El-Rufai

Yanzu-yanzu- An sake sakin daliban kwalejin Afaka da masu garkuwa da mutane suka sace

Me ya sa masu amfani da kafafen sada zumunta suka kaɗu da afkuwar lamarin?

Sani Galadima ɗaya ne daga cikin fitattun masu amfani da kafafen sada zumunta, inda lokaci zuwa lokaci yake nuna takaicin sa kan matsalolin tsaro.

Mabiyan sa a kafafen sada zumunta sun nuna takaicin su kan faruwar lamarin, musamman ma bayan fitar wani bidiyo da Sani Galadiman ya ke bayanin yadda ya aikata hakan.
Ku kalli bidiyon a nan.

ASP. Muhammad Jalige shi ne mai magana da yawun ƴan sandan jihar Kaduna ya tabbatarwa da Freedom Radio faruwar lamarin.

Ya ce, waɗanda ake zargin suna hannun su inda suke ci gaba da bincike.

Yanzu haka dai tuni jama’a suka shiga yin tsokaci game da lamarin..

Ga wasu masu amfani da kafafen sada zumunta da suka tsokaci a kai.