Wani harin bam ya kashe kwamandan soja tare da wasu dakaru shida a jihar Borno, a wani sabon hari da ake zargin yan kungiyar yan ta’adda ta Boko Haram da kai wa.

Lamarin ya faru ne a yankin Monguno, inda rahotanni suka ce motar kwamandan ta taka bam din da aka dasa a hanya yayin da yake kan hanyarsa ta zuwa duba halin da dakarunsa ke ciki bayan artabu da ‘yan ta’adda.

Rundunar Operation HADIN KAI ta bayyana alhininta kan mutuwar sojojin, tana mai cewa sun sadaukar da rayuwarsu wajen kare kasa, tare da jaddada cewa za a ci gaba da yaki da ta’addanci a yankin.