Connect with us

Labaran Kano

Yadda mahaifi ya daure ‘yarsa tsawon wata guda a Kano

Published

on

Wani magidanci mai suna Sani Dayyabu mazaunin unguwar Sheka Aci Lafiya, dake nan Kano, ya daure ‘yarsa mai suna Nafisatu Sani ‘yar kimanin shekara 18 a mari, har tsawon wata guda.

Ana zargin mahaifin ya daureta ne acikin wani daki dake gidansa saboda yawace-yawacen da yace tana yi, dukda cewa tana da larurar tabin hankali.

Sai dai matashiyar Nafisatu Sani ta bayyanawa Freedom Radio cewa mahaifinta ya jima yana dukanta, inda har ta kai ya karya mata hannu, hakan yasa ta tafi gidan kakarta inda tayi jiya a can.

Bayan dawowarta gidan ne sai mahaifinta Sani Dayyabu yayi mata duka sannan ya sanyata a mari ya kuma kulleta a cikin daki.

Hoton matashiyar kenan acikin mari.

Freedom Radio tayi kokarin jin ta bakin mahaifin na ta, amma yace sam ba zaiyi magana da ‘yan jaridu ba.

Wakilinmu Yakubu Musa Kanwa ya rawaito mana cewa shugaban kungiyar kare hakkin dan adam Karibu Yahya Lawal Kabara ya ce tuni suna cigaba da bincike kan wannan al’amari domin daukar matakin da ya dace.

Labarai masu alaka:

Mutumin da ya daure ‘ya’yan sa shekaru 3 a Kano ya rasu a Asibiti

Azabatarwa tayi sanadiyyar tabin hankalin yarinya a Kano.

Continue Reading

Labaran Kano

An bukaci a daga darajar kwalejin ilimi ta Nasiru Kabara zuwa jami’a

Published

on

Dan majalisar dattijai mai wakiltar yankin Kano ta Kudu Sanata Barau Jibrin ya bukaci shugaban darikar kadiriyya ta Afrika Sheikh Kariballah Sheikh Nasir Kabara da ya daga darajar kwalejin ilimi ta addinin musulunci da ya fara ginawa zuwa jami’a.

Dan majalisa Barau Jibrin ya bayyana hakan ne a wajen bikin Maukibi da mabiya darikar Kadiryya suke gudanarwa duk shekara da aka gudanar a yau.

Sanata Barau Jibrin ya ce abin alfahari ne yadda aka fara samun mutane irin su Sheikh Kariballah da suke da kishin ilimin addinin musulunci suna irin wannan yunkuri na bunkasa addinin musulunci, a don haka ne shima yayi alkawarin rubanya aikin ginin har sau uku matukar aka daga darajar kwalejin zuwa jami’a.

Barau Jibrin ya kuma ce matasa na matukar bukatar irin wadannan jami’o’I na addinin musulunci don kaifafa kwakwalwar su, kan ilimin addinin musulunci da kuma harkokin kimiyya da fasaha

Sanata mai wakiltar kudancin Kano ya kuma nuna takaicin sa kan yadda ake da jami’o’in addinin musulunci biyar kachal a Najeriya a lokaci guda kuma ake da na addinin kirista guda 34, yana mai cewa akwai bukatar al’ummar musulmi su dage wajen gina jami’o’in addinin musulunci.

Continue Reading

Labaran Kano

Sulhu tsakanin al’umma zai rage cunkoso a kotuna

Published

on

Wata kungiya mai rajin ganin an tabbatar da gaskiya da adalci dake garin Kumbotso, ta ce samar da kungiyoyin al’umma da zasu dinga aikin sulhunta jama’a zai taimaka wajen rage yawan yadda ake shigar da kararraki gaban jami’an tsaro da ma masu unguwanni a jihar Kano.

Shugaban kungiyar Isyaku Ahmad ne ya bayyana hakan ta bakin sakataran kungiyar dake kula da tsare-tsare Iliyasu Nuhu, yayin taron jin ra’ayin jama’ar garin na Kumbotso kan ayyukan da kungiyar ta sanya a gaba.

Ilyasu Nuhu ya ce a yanzu ana yawan samun shigar da kararraki gaban jamian tsaro kan dan abinda za’a a iya magance shi ta hanyar sulhu, amma sai batun ya yi zafin da har sai anje gaban kotu, yana mai cewa hakan na taka rawa wajen samar da cunkoso a gaban kotuna.

Wasu daga cikin mahalartar taron sun bayyana cewa wannan sabon tsarin zai taka rawa wajen tabbatar da zaman lafiya da kuma fahimtar juna tsakanin al’ummar yankin.

Wakilin mu Abubakar Tijjani Rabi’u ya ruwaito cewa taron ya samu halartar shugabannin addinai daban-daban da kungyoyin kare hakkin dan adam dana yaki da cin hanci da rashawa da sauran al’umma.

Continue Reading

Labaran Kano

Ku kasance masu yin kasuwanci kamar yadda addinin musulunci ya koyar

Published

on

An shawarci ‘yan kasuwa da sauran ma’aikata da su kasance masu gudanar da harkokin kasuwancinsu irin yadda  addinin musulunci ya koyar domin kaucewa fadawa cikin fushin ubangiji a ranar gobe kiyama.

Shugaban cibiyar koyar da zaman Aure da kasuwanci a addinin Musulunci Dakta Yahya Tanko ne ya bayyana hakan yau lokacin taron bita tare da wayar da kan ‘yan kasuwa da ma’aikata kan tarbiyyar addinin musulunci a cikin harkokin kasuwanci.

Ya kara da cewa abin takaici ne yadda ‘yan kasuwa a yanzu suke gudanar da harkokin kasuwancin su, wanda hakan ya sauka daga layin koyarwa irin ta addinin musulunci.

A cewar Dakta Yahya Tanko kamata ya yi duk wani musulmi a ko ina yake ya zama tamkar mudubi da kowacce al’umma zata rika koyi da shi ta fuskar kasuwanci.

Wakilin mu Abdulkarim Muhammad Abdulkarim Tukuntawa ya ruwaito cewa malamai da ‘yan kasuwa da ma’aikata da dama ne suke halarci taron.

Continue Reading

Now Streaming

Trending

Copyright © 2019. Freedom Radio Group. All Rights Reserved.